Fullkomin hreinsistöð tekin í notkun við Brautarholt

Mánudagur, 11. desember 2017

Föstudaginn 24 nóvember var tekin formlega í notkun skólphreinsistöð af fullkominni gerð við Brautarholt að viðstöddum góðum gestum. Stöðin mun þjóna þéttbýliskjarnanum í Brautarholti ásamt tjaldsvæði og gistiþjónustu sem þar er rekin. Börkur Brynjarsson verkfræðingur hjá Umhverfis- og tæknisviði Uppsveita er aðalhönnuður mannvirkisins. Verktaki var Georg Kjartansson á Ólafsvöllum. Með tilkomu hreinsistöðvarinnar er stigið gott framfaraskref í umhverfismálum sveitarfélagsins. Næg afkastageta er í stöðinni til að mæta vexti á svæðinu. Frá hægri á myndinni má sjá Georg verktaka, Skafta oddvita, Börk verkfræðing og Kristófer sveitarstjóra kampakáta við hreinsistöðina.